خدمتِ خلق–ملفوظاتِ محبوبِ ذات

خدمتِ خلق

حضور سرکارِ عالی قدس سرہٗ العزیز نے بر صغیر کے لاکھوں بلکہ کروڑوں انسانوں کو‘ بلا امتیازِ مسلک و عقیدہ‘ اپنے ظاہری اور باطنی فیوض سے سرفراز فرمایا۔ کبھی کوئی سائل آپؒ کے در سے خالی نہ گیا۔ آپؒ رحیم و کریم ایسے تھے کہ آپؒ کے فیوض و برکات مریدین تک محدود نہ تھے بلکہ امتِ محمدیہ ﷺ کا ہر فرد ان کے خُلق عظیم سے فیضیاب ہوتا۔ آپؒ سب کی بخشش کے لئے دعا فرماتے۔ اللہ تعالیٰ کی بارگاہ میں دعا کرتے کہ اے اللہ دین اسلام کو تمام دنیا میں پھیلا دے‘ تمام غیر مسلم خلقت کو اسلام میں داخل فرما تاکہ وہ دوزخ کے عذاب سے بچ جائیں۔ جمیع مریدین و معتقدین اور امت ِ محمدیہ ﷺ کے لئے دونوں جہانوں میں بہتری کی دعا فرماتے۔ یہ سخی ہونے کی دلیل ہے کیونکہ سخاوت صرف مریدین تک محدود نہ تھی‘ ہر ایک کے لئے یکساں تھی۔ مصیبت زدوں کو حوصلہ عطا کرنا یتیموں‘ غریبوں‘ بیواؤں اور بے سہارا لوگوں کو مالی امداد سے نوازنا آپ کا معمول تھا۔ سمادی آفات‘ جنگوں اور انقلابات کے وقت مصیبت زدہ اور بے گھروں کی دل کھول کر مالی امداد فرماتے۔ آپ کا لنگر ہر وقت جاری رہتا۔ بلا امتیازِ امیر و غریب‘ دو وقت ایک ہی دستر خوان پر بٹھا کر سب کو یکساں کھانا کھلاتے۔ مریدین کے علاوہ دربار آنے والے ہر فرد کو بھی کھانا ملتا؛ کسی سے کوئی باز پرس نہ کی جاتی۔ دربار میں آنے والے ہر سائل کی مدد کرتے۔ کوئی فرد بھی آپ کے در سے خالی نہ جاتا۔ بھوکوں اور حاجت مندوں کو کھانا دیتے‘ لاچار اور بے کسوں کو پارچہ جات دیتے‘ یتیموں اور بیواؤں کی مالی امداد فرماتے۔ آپ کے پاس جو رقم یا سامان بطورِ نذرانہ پیش ہوتا، شام تک حاجت مندوں میں تقسیم کر دیتے۔ تمام لواحقین کی ہر طرح سے مدد فرماتے۔

عجز و انکساری–ملفوظاتِ محبوبِ ذات

عجز و انکساری

آپ عاجزی اور انکساری کے پیکر تھے۔ آپ کے کلام میں عاجزی اور انکساری ہمیشہ نمایاں ہوتی تھی۔ اس لئے آپ سرکارِ عالی قدس سرہٗ العزیز نے اپنا تخلص عاجز رکھا تھا۔ آپ اکثر فرماتے عجز اللہ تعالیٰ کو بہت پسند ہے۔ کسی کی زبان سے آپ اپنی تعریف سننا کبھی گوارہ نہ کرتے اور فرماتے تعریف کی سزاوار اللہ تعالیٰ کی ذات مقدس ہے۔ میری کیا حیثیت؟ میں بے کس و مجبور کہ اپنے جسم پر بیٹھی ہوئی مکھی بھی نہیں اڑا سکتا۔
حضور سرکارِ عالی قدس سرہٗ العزیز ’’ محبوبِ ذات‘‘ کے درجے پر فائز ہونے کے باوجود ہمیشہ منکسر المزاج رہے۔ کبھی گھمنڈ نہ کیا، بڑا بول نہ بولا۔ کبھی اپنی تعریف پسند نہ فرمائی۔ کوئی تعریف کرتا تو آپ منع فرماتے۔ جس شخص میں انا موجود ہو وہ کبھی کامیاب نہیں ہو سکتا۔ انسان خود کو پہچانے تاکہ رب العزت کو پہچان سکے۔ آپ ہمیشہ حدیث ِ قدسی کے حوالے سے تلقین فرماتے۔
الحدیث    من عرف نفسه فقد عرف ربه
ترجمہ۔ جس نے اپنے نفس کو پہچانا گویا اس نے اپنے رب کو پہچانا۔ آپ فرماتے اللہ کی تعریف کرو جو سب تعریفوں کا مالک ہے۔ آپ غریبوں، یتیموں اور مسکینوں سے بے حد پیار کرتے ان کی ظاہری و باطنی ہر طرح سے امداد فرماتے۔ ہمیشہ زمین پر مسند لگا کر بیٹھتے۔ آپ کے عجز و انکسار کا اظہار شاعرانہ کلام سے بھی ہوتا ہے۔

حُسنِ سلوک–ملفوظاتِ محبوبِ ذات

حُسنِ سلوک

سرکارِ عالی قدس سرہٗ العزیز کے معمولاتِ حسنہ میں یہ صفت بھی تھی کہ آپ اپنے لواحقین کے حتی المقدور روحانی‘ مادی اور دنیاوی تقاضے خندہ پیشانی سے پورے فرماتے۔ ان کے دکھ درد میں ہمیشہ معاونت فرماتے۔ اگر قرابت دار سے کوئی زیادتی ہو جاتی تو درگذر فرماتے۔ سب کو اپنے لطف و کرم سے نوازتے۔
مریدین سے حسنِ سلوک کی اس سے اچھی روایت اور کیا ہو سکتی ہے کہ آپ مریدین کو ہمیشہ دوست کہہ کر خطاب کرتے‘ انہیں اولاد سے بڑھ کر پیار دیتے؟ ہر فرد یہی دعویٰ کرتا ہے کہ جتنا پیار آپ نے اس سے کیا شاید ہی کسی دوسرے سے کیا ہو۔ اکثر فرماتے مریدین ہماری روحانی اولاد ہیں۔ مریدین کی غلطی پر کبھی سرزنش نہ کرتے۔ بردباری اور عفو و درگذر حضورِ سرکار عالی قدس سرہٗ العزیز کے اوصافِ حمیدہ کا زرین باب ہے کہ ان کی نگاہ میں مغایرت نام کی کوئی شے نہ تھی۔ وہ خلقِ خدا کے لئے سراپا راحت ِ جاں تھے۔
 

اخلاقِ کریمانہ–ملفوظاتِ محبوبِ ذات

باب دوئم  (2)
اوصافِ حمیدہ 
  
مظہر اوصافِ احمد عطرتِ تطہیر ہے
جو عمل جو فعل ہے قرآن کی تفسیر ہے

 

اخلاقِ کریمانہ

آپ کے اوصافِ حمیدہ میں خُلق کو بہت اہمیت حاصل تھی۔ آپ کبھی کسی مرید پر ناراض نہ ہوتے۔ غلطی یا کوتاہی پر عفو و درگذر فرماتے بلکہ لطف و کرم سے نوازتے۔ آپ کا لواحقین سے بھی حُسنِ سلوک ایسا تھا کہ کبھی کسی سے انتقامی جذبہ نہ رکھتے۔ اگر کسی قرابت دار سے زیادتی ہو جاتی تو نہ صرف درگذر فرماتے بلکہ ہمیشہ خندہ پیشانی سے پیش آتے۔ حاجت مند قرابت داروں کی دل کھول کر مالی امداد فرماتے۔ آپ نے کئی مستحقین کے در پردہ وظیفے مقرر کر رکھے تھے۔ لواحقین کی باطنی راہنمائی بھی فرماتے۔ اکثر کو بقا کی منزل سے ہمکنار کیا۔ ان کے دکھ درد میں برابر شریک ہوتے۔ اگر کوئی رشتہ دار بیمار ہو جاتا تو اس کی عیادت خود کرتے۔
ایسے خُلقِ عظیم کا مالک اور محبّ ِ انسانیت اب کہاں! حضرت محبوبِ ذات قدس سرہٗ العزیز سیرت و کردار‘ خوش اخلاقی‘ خوش پوشی‘ فراخ دلی‘ کریم النفسی‘ تواضع و انکساری میں اپنی مثال آپ تھے۔ اہل اللہ کی علامات میں ایک علامت یہ ہے کہ ولی اللہ ہمیشہ سخی ہو گا، خوش اطوار ہو گا، مہربان اور شفقت کرنے والا ہو گا، اخلاق کریمانہ کا مظہر ہو گا۔ حضور سرکارِ عالی قدس سرہٗ العزیز اوصافِ حمیدہ کے پیکر تھے۔ ان کا اندازِ گفتگو دلبرانہ‘ ان کا طریقِ اصلاح ناصحانہ تھا۔ ایک بار آپ کا جس سے بھی سامنا ہو جاتا حضور سرکار عالی اس کے دل پر نقش ہو جاتے۔ پھر بتدریج نکھرتا چلا جاتا، یہاں تک کہ خود آدمی ان کا نقش بن کر رہ جاتا۔ آج بھی ان کے ایسے نقوش دنیا میں زندہ و تابندہ ہیں اور ان کی عظمت کا اعلان کر رہے ہیں۔