جمعہ، 26 اکتوبر، 2012

حضرت امام علی الحق رحمۃ اللہ علیہ کے مزار پر چلہ کشی – ملفوظاتِ محبوبِ ذات

حضرت امام علی الحق رحمۃ اللہ علیہ کے مزار پر چلہ کشی

 

ایک دفعہ آپؒ چلہ کرنے کی نیت سے حضرت امام علی الحق رحمۃ اللہ علیہ کے دربار پر تشریف لے گئے۔ نمازِ مغرب کے بعد مجاوروں نے زائرین کو باہر نکال کر دربار کا دروازہ مقفل کرنے کے لئے آپ سرکار رحمۃ اللہ علیہ سے باہر آنے کی درخواست کی اور بتایا کہ امام صاحب کے دربار میں رات کے وقت قیام نہیں کیا جا سکتا، یہ ناممکنات میں سے ہے۔ آج تک کوئی شخص یہ جرأت نہیں کر سکا۔ آپ ایسا خطرہ مول نہ لیں۔ لیکن ان کے اصرار کے باوجود حضور سرکارِ عالی رات بھر دربار کے اندر ہی عبادت گزار رہے۔ اگلی صبح مجاوروں نے جب دروازہ کھولا تو آپ سرکار  کو معرفِ عبادت پایا اور حیرت سے پوچھا کہ امام صاحب نے آپ کو رات کیسے بسر کرنے دی؟ آپؒ نے فرمایا اہلِ رضا کسی کو کچھ نہیں کہتے۔ اس طرح آپؒ نے پورے چالیس دن دربار کے اندر بیٹھ کر چلّہ پورا کیا۔ چلّے کی تکمیل پر امام صاحبؒ نے ارشاد فرمایا کہ آپ مغرب کی جانب چلے جائیں۔ جس جگہ مغرب کی اذان ہو جائے‘ وہیں ٹھہر جائیں۔ نیز فرمایا اگلی منزل کے بارے میں ہم بعد میں بتائیں گے۔

جمعہ، 19 اکتوبر، 2012

سیّاحی اور تبلیغِ دین – ملفوظاتِ محبوبِ ذات

باب سوئم  (3)

سیاحت، تبلیغ اور
معمولات

سیّاحی اور تبلیغِ دین

 

حضور پاک رحمۃ اللہ علیہ نے ملازمت سے فراغت پا کر پہاڑوں کا رُخ کر لیا۔ آپ نے کوہِ مری سے نینی تال (انڈیا) تک پہاڑی سفر نو ماہ میں طے کیا۔ آپ پہاڑ کی چوٹی سے اتر کر پہاڑوں کے دامن میں واقع گھرانوں اور گاؤں والوں کو اکٹھا کر کے تمام وقت دینِ حق کی تعلیم دیتے اور انہیں نماز اور روزہ کے فوائد سے آگاہ فرماتے۔ آپؒ کے وعظ کا ان پر اتنا اثر ہوتا کہ وہ نماز کے پابند ہو جاتے اور عہد کرتے کہ ہم ہمیشہ نماز گزار رہیں گے۔ اس کے بعد آپؒ دوسرے گاؤں کا رُخ کرتے۔ اس طرح آپ نو ماہ مسلسل پہاڑوں کے دامن میں آباد باشندوں کو وعظ و رشد و ہدایت اور خطبات سے نوازتے رہے۔ آپؒ نے اس دوران مسلسل روزہ رکھا۔ صرف ایک پیالی چائے (صبح و شام) پیتے تھے۔ اس سفر کے دوران مختلف زبانیں بولنے والے لوگ اور قبیلے ملے‘ جن سے حضور نے ان کی مادری زبانوں میں پوری فصاحت اور بلاغت سے دین کی تبلیغ فرمائی۔ یہ بھی کم کمالِ ولایت نہ تھا۔ نو ماہ مسلسل تبلیغ کے بعد واپس راولپنڈی شیخ برادران کے پاس تشریف لے گئے۔ اس وقت آپ کا وجودِ مبارک بظاہر لاغر نظر آتا تھا۔ جب شیخ فضل کریم کو اتنے طویل عرصے کے فاقے کا علم ہوا تو اس نے کہا کہ وہ اپنے ہاتھ سے کھانا پکا کر حضور سرکار عالی کا روزہ افطار کرائے گا۔ آپؒ نے بھی معمول سے زیادہ کھانا تناول فرمایا۔ اگلی صبح آپ فراغت کے لئے نکلے۔ فراغت کے بعد لوٹا بیت الخلا میں چھوڑ آئے۔ شیخ فضل کریم لوٹا اٹھانے گئے تو دیکھا کہ اس جگہ کوئی بول براز نہ تھا بلکہ ہلکی ہلکی خوشبو سے بیت الخلا مہک رہا تھا۔ ماشاء اللہ۔ حضور سرکارِ عالی مادر زاد ولی تھے۔ بچپن سے ہی آپ کی کرامات کا ظہور شروع ہو گیا تھا۔ آپؒ نے ارشاد فرمایا کہ ارواح کو ربّ العزت نے اپنے خاص الخاص قرب کے لئے تخلیق فرمایا ہے‘ وہ ازل سے محرمِ راز ہوتی ہیں۔ وہ روحیں از خود اپنی منزل پر پرواز کرتی ہیں۔ ان کو ظاہری راہنمائی یا راہبر کی ضرورت نہیں ہوتی۔ دورانِ قیامِ انبالہ حضرت فتح علی شہباز صاحبؒ دو تین مرتبہ انبالہ تشریف لے گئے اور سرکارِ عالی کو ظاہری بیعت کے لئے ترغیب دیتے رہے کیونکہ سرکار کی کرامات کا ظہور ہونا شروع ہو گیا تھا۔ کافی اصرار کے بعد سرکار نے اپنے ماموں حضرت فتح علی شہباز منڈیرویرحمۃ اللہ علیہ کے ہاتھ پر بیعت کر لی۔

جمعہ، 5 اکتوبر، 2012

ناگ کا پہرہ – ملفوظاتِ محبوبِ ذات


ناگ کا پہرہ

حضور سرکارِ عالی قدس سرہٗ العزیز نے مری کے پہاڑوں اور جنگلات میں بھی کئی کئی راتیں عبادت میں گذاری ہیں۔ اُن دنوں وہ جنگلات اتنے گھنے تھے کہ وہاں شیروں، چیتوں اور دیگر خونخوار چوپاؤں نے بسیرا کر رکھا تھا مگر کوئی خونخوار جانور آپ  کے لئے باعث ِ زحمت نہ ہوتا۔ بلکہ لوئر ٹوپہ کے مقام پر ایک ناگ آپ  کی عبادت گاہ پر رات بھر پہرہ دیتا رہتا تاکہ عام لوگ اس طرف نہ آئیں۔ آپؒ کے وہاں سے تشریف لے جانے کے بعد وہ ناگ بھی غائب ہو گیا۔

پیر، 1 اکتوبر، 2012

عبادت – ملفوظاتِ محبوبِ ذات

عبادت

بزرگوں سے سنا تھا کہ آپ بچپن سے ہی صوم و صلوٰۃ کے پابند تھے۔ شب بیداری کرتے۔ آپ کے وضائف کئی گھنٹوں پر محیط ہوتے۔ بسا اوقات گھنٹے جنگلوں میں ذکر الہٰی میں راتیں گذارتے۔ کبھی بستر لگا کر چار پائی پر نہ سوتے۔ رضائی کبھی نہ استعمال کرتے؛ شدید سردی میں بھی صرف ایک کمبل پر اکتفا کرتے۔ فجر کی نماز کے بعد صرف ایک گھنٹہ اپنے تخت پر استراحت فرماتے؛ یہ حضور پاک کا شروع سے معمول تھا۔ اللہ تعالیٰ کی رضا حاصل کرنے کے لئے کئی کئی ماہ لگاتار روزے رکھتے۔ صبح و شام چائے کی ایک پیالی اور حسب ِ طلب پانی پیتے۔ کھانا بالکل نہ کھاتے اور کوئی چیز بطورِ خوراک استعمال نہ کرتے۔ آپ ایامِ روزہ میں روز مرّہ کے معمول میں فرق نہ آنے دیتے۔
مسلسل روزوں کے باوجود کوئی تھکاوٹ یا اکتاہٹ محسوس نہ کرتے۔ نمازِ مغرب کے بعد اپنے وظائف پڑھتے جو نصف شب تک جاری رہتے۔ وظائف کے اختتام پر درود شریف کثرت سے پڑھتے۔ مریدین میں درود شریف کی فضیلت بیان کرتے اور سب کو درود شریف کا ورد کرنے کی تلقین فرماتے اور ان کی آگاہی کے لئے فرماتے کہ کوئی دعا بغیر درود شریف کے قبول نہیں ہوتی۔